ඔබව මුළු රාත්‍රියම අවදියෙන් තබන සිතුවිලි දමනය කර නින්දට යෑමට ක්‍රම

නිදාගන්න හිතාගෙන ඇඳට ගියාම ලෝකෙම තියන දේවල් මනසට ඇවිල්ලා නින්දට බාධා කරනවා කියලා ඔයාටත් කවදහරි හිතිලා ඇති. ඇත්තටම අපේ හිත සන්සුන් කරගන්න එක ටිකක් අමාරු වැඩක්. හැබැයි ඉතින් නින්දට යනකොටත් සිතුවිලි එහා මෙහා දුවනවා නම් ඒක සුවපහසු නින්දකට ලොකු බාධාවක්.

ඉතින් අද අපි ඔයාට කියන්නෙ ඔයාගෙ සිතුවිලි මෙල්ල කිරීමට සහ ඉක්මනින් නිදා ගැනීමට උදවු කළ හැකි ඉඟි සහ උපක්‍රම 9 ක් ගැනයි. මේ අතරින් ඔයාට පහසු ක්‍රම කිහිපයකට හුරු වුණොත් ඔයාට මේ ගැටලුවෙන් මිදෙන්න පුලුවන්.

01. මේ මොහොත වෙත අවධානය යොමු කරන්න.

අපිට නිදාගන්න ඉඩ නොදෙන සිතුවිලි ගොඩක් වෙලාවට අතීතය හෝ අනාගතය සමඟ සම්බන්ධ වෙනවා. වෙන්න තියන දේවල් ගැනත් අපි දුක් වෙනවා. නැත්නම් අතීතයේ කරපු හෝ සිදුවුණු දේවල් ගැන අපි පසුතැවෙනවා. ඒ වෙනුවට සිදුවෙමින් පවතින දේ ගැන අවධානය යොමු කරන්න උත්සාහ කරන්න. අපිට අතීතය වෙනස් කරන්න බෑ. අනාගතය ගැන අනාවැකි කියන්නත් බෑ. හැබැයි අපට වර්තමාන මොහොත පාලනය කරන්න පුලුවන්. මේ අවධානය වෙනස් කිරීමෙන් අපේ මොළයට අවශ්‍ය විවේකය ලබා දිය හැකියි.

02. ඉලෙක්ට්‍රොනික උපාංග ඉවත් කරන්න.

නින්දට යන්න කලින් ජංගම දුරකථන, ලැප්ටොප් පරිගණක, හා ටැබ්ලට් භාවිත කිරීමෙන් කාංසාව හා ආතතිය මට්ටම ඉහළ නැංවීමට හැකි බව පර්යේෂණ මගින් හොයාගෙන තියනවා. ඊට අමතරව, මේ ඉලෙක්ට්‍රොනික උපාංගවලින් ලැබෙන ආලෝකය ඔයාගෙ සිරුරේ මෙලටොනින් නිෂ්පාදනයට නරක ලෙස බලපාන අතර, නින්ද යාමට අපහසු වෙනවා.

03. අවධානය වෙනතකට යොමු කරන්න.

දැන් ඔයා ඉලෙක්ට්‍රොනික උපකරණ ඉවත් කරලා තියන නිසා, ඔයාට සෞඛ්‍ය සම්පන්න විකල්ප කිහිපයක් ගැන හිතන්න පුලුවන්. පොත්ක් කියවීම, සංගීතයට සවන් දීම, වගේ මනස නිදහස් වෙන ක්‍රියාකාරකමක නිරත වෙන්න. එහේ මෙහේ දුවන සිතුවිලි නිසා ඔයාට නිදා ගන්න බැරි වුණාම, විවේකී ක්‍රියාකාරකමක යෙදීම මගින් වඩාත් ප්‍රසන්න නින්දක් ලබාගන්න උදව් වෙනවා.

04. කරදර ගැන හිතන්නත් වෙලාවක් වෙන් කරගන්න.

ඔයා, සාප්පු සවාරි යන්න, යාලුවො හම්බෙන්න ‍යන්න වගේම ගෙදර වැඩ කරන්න කාලයක් සැලසුම් කරනවා වගේම, ඔයාට ඔයාගෙ කරදර සඳහාත් දවසට විනාඩි 15 සිට 30 දක්වා කාලයක් වෙන් කරගන්න. ඔයාට කරදර කරන සිතුවිලි සඳහා මේ කාලය කැප කරන්න. මේ “කනස්සල්ලට පත්වන කාලය” තුළ, ඔයාගෙ ආතති සහගත සිතුවිලි කඩදාසි මත ලියා, ඔයා කනස්සල්ලට පත්වන ගැටලුව විසඳීමට ගත හැකි ප්‍රායෝගික පියවර කිහිපයක් ගැනත් හිතන්න. නොපසුබටව සිටින්න. වඩා හොඳ ප්‍රතිඵල ලබා ගැනීමට මේක ඔයාගෙ දිනචරියාවේ කොටසක් කර ගන්න උත්සාහ කරන්න.

05. ලැවෙන්ඩර් අත්‍යවශ්‍ය තෙල්වල සුවඳ ආශ්වාස කරන්න.

ලැවෙන්ඩර් සගන්ධ තෙල් ආතතිවලින් සහන‍යක් ලබාගැනීමට, විවේකයක් සහ වඩා හොඳ නින්දක් ලබා ගැනීමටත් ඇරෝමාතෙරපිවල දී භාවිතා කරනවා. තුවායක් හෝ රෙද්දක් මත ලැවෙන්ඩර් තෙල් බිංදු කිහිපයක් ඉසින්න. නැත්නම් ඔයා නාන වතුරට තෙල් ටිකක් එකතු කරන්න. මේ අත්‍යවශ්‍ය තෙල් මගින් අසාත්මිකතා ඇති කළ හැකි නිසා ඒවා භාවිතා කිරීමේදී ප්‍රවේසම් වෙන්න.

06. මාංශ පේශි ලිහිල් කිරීමේ ක්‍රමයක් උත්සාහ කරන්න.

මේ ලිහිල් කිරීමේ ක්‍රමය ඔයාට ඇඳේ ඉන්න ගමන්ම කරන්න පුලුවන්. ඔයාගෙ මාංශ පේශි එකින් එක ආතතියට පත් කර ලිහිල් කරන්න. ඇඟිලිවල සිට හිස දක්වා ගමන් කරන්න. මේ ව්‍යායාමය වෙහෙසට පත් වූ මාංශ පේශී ලිහිල් කිරීමට සහ ශරීරයේ කොටස් වෙත අවධානය යොමු කිරීමට උදව් කරනවා.

07. නින්දට යාමට බල නොකරන්න.

නිදා ගැනීමට උත්සාහ කර අසාර්ථක වීම වෙනුවට, ඇඳෙන් බැස වෙනත් වැඩක් කරන්න. තේ ටිකක් බොන්න. පොතක් කියවන්න. නිදිමත දැනෙන්නට පටන් ගත් විට ආපසු ඇඳට යන්න.

08. රූපවාහිනිය ක්‍රියාත්මක කරන්න.

නින්දට යාමට පෙර සියලු ඉලෙක්ට්‍රොනික උපකරණ ඉවත් කරන්න කියලා අපි ඔයාට කිව්වා. හැබැයි මේ කිසිම ක්‍රමයක් ප්‍රයෝජනවත් නොවුණොත්, ඔයාගෙ කැමතිම රූපවාහිනී වැඩසටහන බලන්න ගන්න. රූපවාහිනිය මඟින් නිකුත් කරන ආලෝකය ෆෝන් එකෙන් එන ආලෝකයට වඩා ඔයාගෙ ඇස්වලින් දුරස් වන නිසා එය ඔයාගෙ නින්දේ සුවපහසුවට ෆෝන් එකෙන් තරම් ලොකු බලපෑමක් ඇති කරන්නෙ නෑ. ඇත්ත වශයෙන්ම, අප බොහෝ දෙනෙකුට ඇස් වසාගෙන රූපවාහිනියට සවන් දීමෙන් පහසුවෙන් නින්දට යා හැකි බව කියන්නෙත් ඒකයි.

09. හුස්ම ගැනීමේ අභ්‍යාස උත්සාහ කරන්න.

අපේ සිතුවිලි එහා මෙහා දුවන්නෙ ආතතිය නිසයි. ආතතිය මගින් අපගේ හදවත් ස්පන්දනය වේගවත් කර අපේ හුස්ම ගැනීමේ වේගය වැඩි කරනවා. හෙමිහිට, ගැඹුරු හුස්මක් ගැනීමෙන් ඔයාගෙ සිතුවිලි සන්සුන් කිරීමට උදව් වෙනවා. ඒ වගේම ආතතිය සහ කාංසාව වළක්වා ගැනීමට ඕනෑම වේලාවක පුහුණු කළ හැකි වෙනත් හුස්ම ගැනීමේ අභ්‍යාස සහ ශිල්පීය ක්‍රමත් උත්සාහ කරලා බලන්න පුලුවන්.

මේ ඉඟි සහ උපක්‍රම මගින් ඔයාට ඊලඟ වතාවෙදි සිතුවිලි එක්තැන් කරගන්න බැරි වීම නිසා නින්ද නොයාමේ ප්‍රශ්නය විසඳගෙන ඉක්මනින් නිදා ගැනීමට උපකාරී වේවි කියලා අපි හිතනවා. ඒත් ඔයාට නින්ද නොයෑමේ ගැටලුව වෙනත් වෛද්‍ය හෝ මානසික තත්ත්වයක් එක්ක සම්බන්ධ විය හැකි බව දැනෙනවා නම්, වෛද්‍ය උපදෙස් ලබාගන්න එක ගොඩාක් වැදගත් බවත් මතක තබාගන්න.

Leave a Reply

Your email address will not be published. Required fields are marked *