කෑම උයනකොට මේ වැරදි 12 නම් කවදාවත් කරන්න එපා

හොඳ රෙසිපි එකක් බලාගෙන, තියන හොඳම වර්ගයේ අමුද්‍රව්‍යත් ගානට එකතු කරලා උපදෙස් ටිකත් හරියටම පිළිපැදලා හදපු කෑම එකක් පොඩ්ඩක්වත් රස නැති වුණාම දැනෙන හැඟීම ඔයත් අත්විඳලා තියනවද? මේ අත්දැකීම එකවරක් හෝ කිහිප වරක් ඔයාලා ඕනම කෙනෙක්ට ලැබිලා තියන බව අපිට හොඳටම විශ්වාසයි. ඉතින් මෙහෙම වෙන්න හේතුව මොකක්ද කියලා ඔයාට හොයලා බලන්න හිතුණද?

ඒ නිසා අපි හිතුවා උයනකොට අපි හැමෝටම වෙන්න පුලුවන් වැරදි අඩුපාඩු මොනවද කියලා හොයලා බලන්න. අපේ කැමතිම කෑම වර්ගයේ රස නැති කරන්න පුලුවන් මේ වැරදි මොනවද කියලයි දැන් අපි ඔයාට කියන්න යන්නේ.

01. පෑන් එකට ඕනෑවට වඩා බර පැටවීම

මස් වලට හොඳ ක්‍රිස්පි ගතියක් ලබාගන්න ඕනෙ නම් පෑන් එකට එක සැරේට මස් ගොඩක් දාන්න එපා. හොඳට ඉඩ තියන විදියට තියන්න. එහෙම නැති වුණාම මස් තැම්බෙනවා.

02. නොන්ස්ටික් පෑන් එකේ මස් පිසීම

මස් පිසිනකොට නොන්ස්ටික් පෑන් එකක් පාවිච්චි කලොත් මස්වල ක්‍රිස්පි ගතිය නැති වෙනවා. නොන්ස්ටික් පෑන් එකක් සාමාන්‍ය පෑන් එකට වඩා රත් වෙනවා අඩුයි. ඒ නිසා ඔම්ලට් හා පෑන් කේක් හදන්න නොන්ස්ටික් පෑන් එක සුදුසුයි. ඒත් මස් පිසින්න නම් ග්‍රිල් පෑන් හෝ යකඩ පෑන් එකක් පාවිච්චි කරන එක හොඳයි.

03. පැස්ටා තම්බන වතුරට ලුණු එකතු නොකිරීම

පැස්ටා හදනකොට දැනගන්න ඕන පලවෙනිම නීතිය තමයි පැස්ටා තම්බන වතුරට ලුණු දැමීම. ලුණු අඩු වුණොත් පැස්ටාවල රස නැති වෙනවා. ඒ වගේම පැස්ටා පිළිගන්වනකොට සෝස් සමග පිළිගන්වන්න. ඔයාට ලුණු කොච්චරක් දාන්න ඕනද කියලා හිතාගන්න අමාරුයි නම් පැස්ටා ග්‍රෑම් 300 කට ලුණු මේස හැන්දක් දාන්න.

04. ඔලිව් ඔයිල් යොදා ෆ්‍රයි කිරීම

වැඩි උෂ්ණත්වවලදි ඔලිව් ඔයිල්වල තියන පෝෂක කොටස් විනාශ වෙලා යනවා. එමගින් ඔයාගෙ කෑම එකේ රස නැති වෙන්න පුලුවන්. ඒ නිසා සැලඩ් හදනකොට ඔලිව් ඔයිල් පාවිච්චි කරන්න. බැදීම් වලට සන්ෆ්ලවර් ඔයිල් යොදාගන්න.

05. වියළි අමුද්‍රව්‍ය වල ප්‍රමාණය වීදුරුවකින් මැනීම

ගොඩක් අය පිටි ගුලියක් අනනකොට අවශ්‍ය වියළි හෝ දියර අමුද්‍රව්‍ය එකතු කරන්නෙ මිම්මක් ලකුණු කරලා නැති වීදුරුවකින්. බේක් කරන කෑම හදනකොට අවශ්‍ය ද්‍රව්‍ය හරිම ප්‍රමාණයට දාන්න ඕන කියලා හොඳට මතක තියාගන්න. ඔයාට මේ මිනුම් ඔක්කොම මතක තියාගන්න අමාරුයි කියලා අපි දන්නවා. ඒ නිසා ඒ සඳහා මිනුම් ලකුණු කරලා තියන කෝප්පයක් කුස්සියේ වැඩවලට පාවිච්චි කරන්න.

06. උයන්න කලින් පෑන් එක හොඳින් රත් කර නොගැනීම

හොඳම සූපවේදියෝ කියන්නෙ ඔයාට පෑන් එක රත් වෙලා මදි කියලා හිතෙනවා නම්, තව විනාඩි දෙකක් ඉඳලම උයන්න පටන් ගන්න කියලයි. එලවළු හා මස් වර්ග හදනකොට පෑන් එක හොඳින් ‍රත් වෙලා තියෙන්න ඕනෙ.

07. සුදුළූණු ඕනෑවට වඩා පිසීම

සුදුළූණු වල අනික් එළවලුවලට වඩා වතුර අඩුවෙන් අඩංගුයි. ඒ නිසා සුදුළූණු ඉක්මනට තැම්බෙනවා. ඕනවට වැඩිය සුදුළූණු ලිපේ තිබුණොත් ඔයාගෙ කෑම එකට අප්‍රසන්න සුවඳක් එනවා. ඒ නිසා උයලා ඉවර වෙන්න ළං වෙද්දි හරි, එහෙමත් නැත්තන් ලිපෙන් බාන්න විනාඩි 2-3 ට කලින් තමයි සුදුළූණු එකතු කරන්න ඕන.

08. මස් වර්ග අධි ශීතකරණයෙන් එළියට ගත් හැටියෙම පෑන් එකට දැමීම

මස් උයන්න කලින් පැය දෙකක්වත් කාමර උෂ්ණත්වයේ තියන්න ඕන. කාමර උෂ්ණත්වයේ තියන මස් උයනකොට ඒකාකාරීව මස් තැම්බෙනවා. අධි ශීතකරණයෙන් ගත්ත ගමන් පෑන් එකට දැම්මොත් ඉක්මනින් තැම්බුණා වගේ පෙනුනට ඇතුළෙන් අමු වෙන්න පුලුවන්. මස් අවන් එකේ බේක් කරද්දිත් මේ විදියම තමයි.

09. මස් උයලා ඉවර වුණු ගමන්ම ආහාරයට ගැනීම

ලිපෙන් බාපු ගමන් හෝ අවන් එකෙන් එළියට ගත්තු ගමන් මස් වගේ ආහාර එකපාරම කන්න යන්න එපා. විනාඩි දෙක තුනක්වත් ඉන්න. ටිකක් ඉඳලා කෑවොත් ඔයාගෙ කෑම එකේ රස ගැන ඔයාටම පුදුම හිතෙයි.

10. හැමදේම ෆ්‍රිජ් එකේ දැමීම

තක්කාලි, ළූණු, සුදුළූණු, අල, වම්බටු වගේම කිවි හා අඹ වගේ පලතුරුත් ෆ්‍රිජ් එකේ නොදා තරමක් වියළි තැනක තිබ්බොත් රස වැඩියි. මේවා ෆ්‍රිජ් එකේ දැම්මොත් ඒවගේ රස හා නැවුම් බව නැති වෙලා ඉක්මනින්ම නරක් වෙනවා.

11. සැරින් සැරේ හැන්දෙන් එහා මෙහා කිරීම

මස් උයනකොට ඕනෑවට වඩා කලවම් කරන්න යන්න එපා. එහෙම වුණොත් මස් හෝ මාළු ඉක්මනින් කැඩෙනවා. නැත්නම් කුඩු වෙනවා. ඒ වගේම වැඩිපුර වියළෙනවා. ඒ නිසා සැරින් සැරේ හැන්දෙන් එහා මෙහා කරන්න යන්න එපා.

12. බිත්තර ඕනෑවට වඩා වැඩිපුර තැම්බීම

ඔය කවදහරි බිත්තරවල සුදු හා කහ මදය වෙනුවට මේ වගේ රබර් රසක් තියන අළු පාට තත්වයක් දැකලා තියනවද? ඇත්තටම මේක බිත්තරවල ගුණාත්මක බව නිසා වෙන දෙයක් නෙවෙයි. ගොඩක් වෙලාවට ඕනෑවට වඩා බිත්තර තැම්බුණු නිසා තමයි මෙහෙම වෙන්නෙ. ලස්සනට බිත්තර තම්බගන්න නම් වතුර නටනකොට ලිප නිවලා පියන වහලම විනාඩි 10 ක් විතර බිත්තර ටික උණු වතුරෙම තියෙන්න හරින්න. මෙමගින් බිත්තර සුදු මදය හා කහ මදය වැඩිපුර තැම්බෙන්නෙ නැතිව ලස්සන පාටකින් ලබාගන්න පුලුවන්.

Leave a Reply

Your email address will not be published. Required fields are marked *